Во текот на 2022 година во ЕУ беа инсталирани 2,8 милиони единици, но тој број падна на 2,7 милиони во 2023 и на 2,11 милиони во 2024 година. Сепак, благодарение на комбинацијата од пониски трошоци за инсталација и субвенции, оваа зелена технологија повторно дојде во центарот на вниманието.
Според прелиминарните податоци на Европското здружение за топлински пумпи (EHPA), продажбата на топлински пумпи пораснала во просек за 10,3 отсто во 16 европски земји во текот на 2025 година. Во тој период се продадени 2,62 милиони единици за домаќинствата, со што вкупниот број ширум континентот достигна 28 милиони.
Ранг листа на топлински пумпи во Европа
Скандинавија и понатаму претставува најголем пазар кога продажбата ќе се спореди со бројот на жители – во три клучни земји во текот на 2025 година се продадени повеќе од 30 топлински пумпи на 1.000 домаќинства.
Норвешка предничи со 662 топлински пумпи на 1.000 домаќинства, а следуваат Финска (548), Шведска (509) и Данска (229), пренесува Euronews. Овие традиционално ладни земји покажаа дека топлинските пумпи се многу ефикасни дури и при ниски температури, што ја побива честата заблуда која многу Европјани ги одвраќаше од преминување на оваа технологија.
Од 16-те анализирани европски земји, Франција го зазема петтото место со 216 топлински пумпи на 1.000 домаќинства. Следуваат Белгија (196), Италија (184) и Швајцарија (179).
Топлинските пумпи попродавани од гасните котли во Германија
Во Германија топлинските пумпи станаа најпродаван систем за греење и сочинуваа речиси половина (48 отсто) од сите нови системи за греење продадени минатата година. Тоа претставува раст од 21 отсто во однос на 2024 година, со вкупно 299.000 продадени единици, додека уделот на гасните котли падна на 44 отсто.
Во Белгија продажбата исто така порасна за седум отсто, на 11.000 единици. Експертите наведуваат дека причина за растот е воведувањето нови ограничувања за греење на фосилни горива, како и намалувањето на ДДВ-то за топлинските пумпи.
Велика Британија забележа раст на продажбата од 27 отсто, на вкупно 125.000 единици. За овој раст е заслужна државната шема „Boiler Upgrade Scheme“, која на домаќинствата им овозможува грант од 7.500 фунти (околу 8.658 евра) за вградување воздушни или геотермални топлински пумпи.
Наспроти тоа, во Полска продажбата минатата година опадна. Министерството за клима и животна средина наведува дека „бранот дезинформации“ за начинот на функционирање на оваа технологија ја забавува модернизацијата.
Војната со Иран го поттикнува процутот на пазарот
Енергетските шокови предизвикани од војната со Иран би можеле дополнително да го забрзаат преминот кон топлински пумпи, додека Европа сè посилно вложува во домашни и чисти извори на енергија.
Според податоците на компанијата Octopus Energy, продажбата на топлински пумпи во Велика Британија пораснала за повеќе од 50 отсто во текот на првите три недели од март во споредба со истиот период претходниот месец, по практичното затворање на Хормушкиот теснец.
Продажбата на топлински пумпи за домаќинствата порасна во просек за 25 отсто во текот на првиот квартал од 2026 година во Франција, Германија и Полска. Според податоците на EHPA, вкупниот европски просек го намали Австрија, каде продажбата падна за 30 отсто поради „недостаток на државни субвенции“.
Извор: odrzime.rs
